#وظفني_شكراً : التحرش الجنسي في العمل

السلام عليكم اخواني الكرام في كل زمان ومكان اليوم سأضع بين ايديكم                     

موضوع هام للغاية وشائك جدا وواقعي ايضا وهو :

التحرش الجنسي في العمل

التعرض للتحرش في مكان العمل، يعتبر من اكبر و أسوأ المشاكل اللي ممكن يواجهها الموظف. لكن لكل مشكلة حل، و انت كموظف تقدر تمنع الممارسات ده عشان تحمي نفسك و الآخرين في الشغل. بداية من معرفتك بحقوقك، و فهمك للقواعد السلوكية اللي بتنظم شركتك او المكان اللي بتشتغل فيه، و انتهاءاَ بتقديم شكوى او رفع قضية، وظفني شكراً بتقدملك الخطوات اللي لازم تعملها لما تتعرض لموقف التحرش الجنسي في العمل.

مبدئياَ: عارفين إنه هتيجي ردود افعال تستغرب ليه المقال موجه للذكور والإناث. السبب بسيط: الحقيقة إن الذكور بيتعرضوا للتحرش (سواء تحرش جنسي او غير) او التنمر او المضايقة وإن كان بنسبة أقل من الإناث. كل مواطن ليه الحق في العمل والحياة دون تحرش او مضايقة ولإن وظفني شكراً ضد التحرش بكل أنواعه فالمقال موجه لكل الناس. فاعل ومفعول به. سبب ورد فعل. ضحية وجاني وشاهد. أقف مع وظفني شكراً ضد التحرش وخلي مكان عملك بيئة خالية من التحرش ولو محتاج مساعدة، وظفني شكراً معاك. 

متقدمش استقالتك، انت ليك حقوق!

الهروب من المشكلة دائما سهل، لكنه مبيحلش المشكلة، و الاهم من كده، انه مبيضمنش انك كموظف مش هتتعرض لنفس المشكلة في اي مكان تاني تروحه. عشان تتجنب ده، اول خطوة لازم تعملها هي انك تفهم قوانين العمل في بلدك و تعرف القواعد السلوكية بتاعة الشركة اللي بتشتغل فيها، لان ده اولا بيعرفك حقوقك، و ازاي تطالب بها. بغض النظر عن المكان اللي بتشتغل فيه، اي شركة او مكان عمل لازم يلتزموا بتوفير بيئة آمنة و صحية لكل موظفيها و عمالها. وتوفير بيئة آمنة مبيقتصرش على حماية الموظفين من المواد الكيميائية او ادوات العمل الخطرة، و لكن كمان بيشمل توفير بيئة صحية بتشجع انتاجية الموظفين و قدرتهم على اداء العمل. بمعنى تاني، توفير مكان مبيسمحش لحدوث اي نوع من انواع التحرش او المضايقة للموظفين. و بالرغم من ان الشروط ده لازم يطبقها قانون العمل في الدولة على كل شركة او مكان عمل، الا انهم لازم يحددوا قواعد سلوكية تكون خاصة بهم. القواعد ده بتحدد الشروط و القوانين و الحقوق و الواجبات اللي كل فرد في الشغل لازم يلتزم بها، و يتعاقب لو خالفها. القواعد السلوكية للشركة بتكون مفصلة ومناسبة اكتر على حسب طبيعة الشركة و شغلها

.متتأخرش:

لو في حاجة غلط بتحصل في الشغل، و انت او زميلك بيتعرض للتحرش، متستناش عشان تتصرف. انك تتجاهل الإساءة بيعرضك لمضايقات و اساءات اكتر. لكن الاهم من كدة، انك لما مبتحاولش توقف الإساءة انت بتتخلى عن حقوقك و بتصعب على نفسك المطالبة بهم في المستقبل. بمعنى اخر، انت لما بتفضل ساكت على الاساءة، و بعدين بتقرر انك تشتكي، بعد شهر مثلا، انت كدة بتصعب على مديرك انه يصدقك لانك ماشتكتش قبل كدة. كمان انت لما مبتشتكيش بعد حدوث الاساءة، انت بتوصل للموظفين ان التحرش عادي و مقبول. عشان كدة متخافش و اشتكي على طول لو اتعرضت او حد من زمايلك اتعرض لاساءة او تحرش في العمل.

اتكلم مع الشخص المسيء مباشرة.

ابدا بالشخص المسيء، روحله و اطلب انه يوقف اهانته فورا. ساعات الشخص المسيء بيكون مش عارف انه بيؤذيك او بيضايقك، لانك ماعترضتش على إساءته قبل كدة، او لانه متعود يتصرف بنفس الطريقة مع كل الناس. احيانا انك تتكلم مع الشخص المسيء مباشرة بيحل المشكلة كلها. لانك بتعرفه ان تصرفاته بتهينك، و بتصر انه يوقفها، او انك هتصعد الموضوع للادارة، و ده غالبا بيخليه يبطل و مشكلتك بتتحل. بس اهم حاجة انك اعترضت و اخدت ولو خطوة عشان تحل المشكلة.

بلغ مديرك في الشغل.

لو كلامك مع الشخص المسيء محلش المشكلة، يبقى لازم تبلغ مديرك او المشرف عليك في الشغل. كن دقيق لكن مختصر، اوعى تخاف و عرفه كل حاجة حصلتلك. مديرك لازم يعرف ايه اللي مضايقك، ومن واجبه انه يساعد في حل المشكلة و يوفر بيئة عمل مريحة. من ناحية تانية، لو انت مش مستريح انك تتكلم مع الشخص المسيء مباشرة، يبقى الافضل انك تعرف مديرك عشان يتابع الشخص ده و يتدخل عشان يوقف الاساءة. وبشكل عام، يفضل انك تعرف مديرك بالإساءة حتى لو حليت مشكلتك مع الشخص، عشان المدير يقدر يتابعه و يمنعه انه يضايق اي شخص تاني.

اكتب المضايقات اللي بتتعرضلها و سجل كل حاجة.

اكتب كل حاجة متعلقة بحالة التحرش، و سجل مين اللي قام بها و عمل ايه و امتى. و سجل كمان كل مرة بتتكرر فيها الاساءة، و الكلام والتصرفات اللي الشخص المسيء بيعملها. انك تحتفظ بسجل مكتوب عن المضايقات اللي اتعرضتلها بيثبت ان الشخص المسيء يقصد الاهانة، و ده بيدعم شكوتك بالدليل عشان محدش يشكك فيها. لكن انك تسجل الاساءات اللي بتتعرضلها مش معناه انك تستنى ان الشخص المسيء يكرر إساءته عشان تبلغ عنه. بلغ اول ما يحصل اساءة او تحرش، و سجل دايما كل اللي بيحصل عشان يثبت شكوتك بعد كده لو احتاجت.

طالب بحل للمشكلة.

انك تتكلم مع الشخص المسيء او تبلغ مديرك، ده اكيد خطوة كويسة عشان تحل المشكلة، بس متنساش انها لسة الخطوة الاولى. وده معناه انك مينفعش تقف هنا، ولكن لازم تطالب باتخاذ خطوات تانية لحد ما المشكلة تتحل نهائيا. من حقك كموظف انك تلاقي مديرك بيبذل مجهود عشان يوقف الاساءة و يعيد الامان لبيئة العمل. لو ده محصلش، يبقى لازم ترفع الشكوى لادارة اعلى تقدر تحل المشكلة، و تعاقب مديرك عشان متصرفش صح. وفي بعض الاحيان، ممكن تحتاج انك ترفع شكوى او قضية عشان تطالب بحقك، لو مفيش تغيير حصل في الشركة. مهما كان حل مشكلتك بعيد او صعب، اهم حاجة انك متتخلاش عن حقوقك و تفضل ساكت.

هحتاج محامي؟ احيانا بس مش دائما.

لو انت عملت كل الخطوات عشان تحل مشكلتك و تتخلص من الاساءة في الشغل، بس مفيش فايدة، احيانا بتحتاج انك ترفع قضية و تعين محامي. لكن خلي الحل ده اخر خياراتك لما تلاقي ان شكوتك بتؤجل او بيتم تجاهلها، و ده بيضيع حقوقك اكتر و بيعرضك لمضايقات و اساءات اكتر في مكان العمل.

التحرش الجنسي و القانون في مصر.

مصر مكنش فيها اي قانون يعاقب المتحرش جنسيا لحد سنة 2014والقانون اللي تم الموافقة عليه بيعطي للمتحرش عقوبة تصل لخمس سنين سجن، و غرامة تصل لخمسين الف جنيه مصري. لكن اذا حصل التحرش في مكان العمل سواء من المدير او اي موظف له سيطرة على موظف تاني، فالعقوبة بتبقى سنتين سجن على الاقل و غرامة ممكن توصل لعشرة الاف جنيه. عشان كده اوعى تفرط في حقوقك او تخاف انك تبلغ لو حصلك او لاي موظف تاني اساءة أو تحرش في الشغل.

بتواجه اي نوع من المشكلات اللي عرضناها؟ بتتصرف أو بتتصرفي ازاي؟ إحكيلنا قصصك بسرية تامة في أي وقت وظفني شكراً هتساعدك. هتلاقينا على وظفني شكرا ، فيسبوك، تويتر